Намайг хүүхэд байхад байгал дэлхий маань ямар ч сайхан, хүн зон нь ямар ч хүнлэг байсан юм бэ гэж надад хааяа бодогддог юм. Бямба гарагт бороо ороход хөгшчүүл бямбын бороо бямбадаа гэж хэлэхэд яг л долоо хоног бороо шивэрч бямба гарагтаа л тэнгэр цэлмэдэгсэн.

Би бээр барилгын салбартай ажил амьдралаа холбоод 16 жилийг ардаа орхижээ. Энэ олон жилүүдэд ихэвчлэн хувийн орон сууцнууд барьж ашиглалтанд өгч байсан байх юм. Нэгэн өвлийг ардаа орхиод л бөөн туршлага сургамж нэмэгддэг юм. Яагаад гэвэл барьсан барилгын маань төлөвлөлт нь буруу, материалын сонголт нь буруу, чанаргүй гүйцэтгэл гээд л бүх муу талууд нь өвлийн хүйтэнд илэрнэ дээ. Гэхдээ энэ бүхэн маань ирээдүйн барилгуудад маань бөөн сургамж туршлага болон улам сайжирч төлөвлөгддөг. 16 жилийн өмнө барьсан барилгаа одоо харахаар инээдтэй, гунигтай, хөгжилтэй санагддаг.